సంపాదకీయ విధానం

‘మరో మాట’లో ఏం ఉంటుంది, ఎలా రాస్తాను, తప్పు జరిగితే ఏం చేస్తాను — ఈ విషయాలన్నీ పాఠకులకు స్పష్టంగా తెలియాలని ఈ పేజీ.

ఇవి నా అభిప్రాయాలు

ఈ బ్లాగ్‌లోని కథనాలు నా వ్యక్తిగత అభిప్రాయాలు, ఆలోచనలు, ప్రశ్నలు. ఇది వార్తా సంస్థ కాదు. ఇక్కడ రాసేది నా సొంత మాట — నేను పనిచేసే సంస్థ అభిప్రాయం కాదు, ఏ పార్టీ, ఏ సంస్థ అభిప్రాయమూ కాదు.

ఒక అంశంపై నా అభిప్రాయం మీకు నచ్చకపోవచ్చు. అది సహజం. విభేదించే స్వేచ్ఛ మీకుంది; నా వాదనను సరిదిద్దే అవకాశం నాకుంది.

ఎలా రాస్తాను

ముప్పై ఏళ్లకు పైగా తెలుగు దినపత్రికల సాంకేతిక విభాగంలో పనిచేశాను. పత్రికల ఇంటర్నెట్ ఎడిషన్లకు కంటెంట్ ఎడిటర్‌గా ఉన్నాను. ఈ అనుభవం నుంచే చాలా కథనాలు పుడతాయి. ఏ కథనం నా సొంత అనుభవం మీద ఆధారపడిందో అందులోనే చెబుతాను.

వార్తా ఘటనలు, గణాంకాలు, ప్రకటనల మీద రాసినప్పుడు — వీలైనంత వరకు వార్తా కథనానికో, అధికారిక ప్రకటనకో లింక్ ఇస్తాను. ధ్రువీకరించలేని విషయాన్ని ‘విన్నాను’, ‘అంటున్నారు’ అని స్పష్టంగా చెబుతాను; నిజమని చెప్పను.

ఒకరిపై విమర్శ రాసినప్పుడు వ్యక్తిని కించపరచడం కాకుండా, వారి మాటలు, చేతలపైనే విమర్శ ఉండేలా చూసుకుంటాను.

తప్పులు – సవరణలు

తప్పు జరిగితే దాచను. వాస్తవ దోషం (పేరు, తేదీ, సంఖ్య, ఘటన) తెలిస్తే కథనంలోనే సరిచేసి, పైన “సవరణ” అనే గమనిక తేదీతో సహా పెడతాను. అభిప్రాయం మారితే పాత కథనాన్ని తొలగించకుండా, కొత్త కథనం రాసి రెండింటినీ లింక్ చేస్తాను.

తప్పు కనిపిస్తే contact@maromaata.comకు రాయండి. ఏ కథనం, ఏ వాక్యం, ఏమిటి తప్పు — ఈ మూడు చెబితే చాలు. సాధారణంగా రెండు మూడు రోజుల్లో స్పందిస్తాను.

అతిథి రచనలు

‘అతిథి మాట’ విభాగంలోని కథనాలు ఆయా రచయితల సొంత అభిప్రాయాలు. ప్రతి అతిథి కథనం పైనా రచయిత పేరు, పరిచయం, ఫోటో ఉంటాయి. ప్రచురించే ముందు వాస్తవాలు, భాష చూసుకుంటాను; అభిప్రాయాన్ని మార్చను. అతిథి రచనలకు పారితోషికం లేదు; ప్రచార రచనలు, చెల్లింపు రచనలు స్వీకరించను.

వ్యాఖ్యలు

వ్యాఖ్యలకు స్వాగతం — ఏకీభవించినా, విభేదించినా. వ్యక్తిగత దూషణలు, ద్వేష ప్రసంగం, స్పామ్ లింకులు మాత్రం తొలగిస్తాను. వ్యాఖ్యల్లోని అభిప్రాయాలు వ్యాఖ్యాతలవే.

ప్రకటనలు – స్వతంత్రత

ఈ బ్లాగ్‌లో ప్రకటనలు లేవు, స్పాన్సర్డ్ కథనాలు లేవు. ఏ సంస్థ నుంచీ ఆర్థిక సహాయం తీసుకోవడం లేదు. బ్లాగ్ ఖర్చులు నా సొంతం. ఎప్పుడైనా ఇది మారితే ఈ పేజీలోనే చెబుతాను.

గోప్యత

మీ సమాచారాన్ని ఎలా చూసుకుంటానో గోప్యతా విధానం పేజీలో ఉంది.

చివరి సవరణ: 16 సెప్టెంబర్ 2026

— చెర్మాల శ్రీనివాస్